話說，我同老公嘅友人A兩年前結婚嘅日子，就係另外一位友人B嘅太太臨盆之日。咁大家當然開心啦，但係因為佢哋係好熟嘅朋友，所以始終都覺得去唔到友人A嘅婚禮唔多唔少都係一種遺憾。

又話說，尋日係我哋嘅好朋友Joseph同Wynnie結婚嘅大日子，其實我哋一直都驚去唔到呢個婚禮，因為呢日距離我嘅due date只係5日，咁你知啦，呢個世界乜嘢事都會發生㗎嘛，所以我同老公都wonder，同樣事情會唔會再發生呢...

尋日零晨大約4點零，突然間feel到個肚「拿住拿住」痛喎，仲要好有規律地大約每10分鐘痛一次，每一次30-40秒...

吓？唔係吖嘛？

我同老公一邊瞓，一邊計住啲痛嘅時間同埋中間相隔嘅時間。由4點幾一路數到5點幾6點。

後來老公就話：「不如唔好咁緊張啦，呢個時候最緊要有得瞓就瞓啦！遲啲阿B出咗嚟就真係想瞓都無得瞓啦！

唔，有道理，都係快啲瞓啦...

但係好奇怪喎，我一唔專登去數，啲痛就好似無咁犀利咁嘅？

跟住我諗吓諗吓，喂，有啲唔似喎，我去完厠所以後，好似就無咁痛嘞喎...

我先發現，唔，好似唔應該係咁㗎下話？

我諗啲痛應該係因為我之前嗰日食嘢食得太混亂先至會咁嘅啫。

終於我哋都去咗Joseph同Wynnie嘅婚禮，仲去埋夜晚嘅banquet㖭！

It was a great and touching wedding! I'm glad I was there! :)

***

不過今日凌晨我又feel到啲痛，（又係4點幾開始喎！）呢次就真係似嚟真嘞。

不過因為我都係比較casual啲去面對，今次就好似痛得無咁密咁，不過全日我都有痛吓痛吓咁。

我諗都真係差唔多啦...