呢兩個星期，身體開始有啲變化...或者應該話，多咗啲唔係好舒服嘅情況。

例如隻腳有水腫啦。而家（特別係今日）對腳腫到好似豬蹢咁。

通常我都係左腳腫過右腳嘅，可能係因為我多數向左邊瞓，無乜機會long高佢啦。

不過其實都無乜影響嘅，又唔會搞到行動不便，只係著唔到啲扎住腳背嘅鞋啫。咁咪著平底鞋囉。

另外一個都令我幾懊惱嘅變化，就係我開始牙痛嘞。又唔係話成日痛嘅，只係有時候會突然間隱隱作痛，㩒住佢一陣麻痺咗就會好啲㗎啦...

嘩，但係真係慘過大病㗎你都唔好話！

有時候仲會痛到瞓瞓吓覺醒咗㖭... :(

我都有同我個家庭醫生講，不過佢實在太乜都無所謂，佢同我講「你而家其實可以食tylenol㗎！」er，我就真係唔係好想食藥囉...

咁我又未致於痛到食唔到嘢嘅，瞓覺嘅時候如果痛嘅話，只要坐起身就會好少少嘅。

所以而家我只有頂住先，等到阿B出咗世先處理啦...