多謝各界嘅關心同愛，相信有Facebook嘅朋友應該都從我身邊無盡咁多朋友度知道我已經由1個變成2個，進入人生嘅另一個階段 ﹣升級為阿媽級啦！亦都應該有唔少朋友會見過我個仔嘅相，不過我唔會咁孤寒嘅，等多我一陣啦，我就會Post番啲相俾大家睇㗎啦！ :)

不如同大家講吓我個仔嘅資料先啦：



姓名：
English: Koen Chan
中文：陳言享
出生日期：2007年8月21日
時間：04:53am
出生體重：6磅8安士

個名有乜解：
English: Koen係有兩個Origin嘅，一個係德文，意思係"Honest Counsellor"。我同Jimmy都希望佢大個咗可以成為別人嘅祝福，做一個誠實嘅安慰者，輔導別人，幫助別人。而另一個Origin就係希伯來文，意思更加明顕："Priest"。我哋除咗想阿仔幫助人之外，更加想佢多多認識神，作為上帝君尊的祭司。

中文：
吟首詞先：

主既陳言，
享而重之。

呢兩句係我老公喺幫阿仔改名嘅時候作嘅。意思即係話，神已經將佢嘅說話講咗俾我哋聽，我哋就要好好咁享受同埋重視／珍重上帝嘅話說語。呢個亦都係我哋對阿仔嘅一個期望，但願佢既享受亦珍重神嘅話語。另外，個「言」字同個「享」字加埋，就變成一個「諄諄善誘」嘅「諄」字。同英文名一樣，我哋希望阿仔可以用佢從神裡面學到嘅去教導，引導身邊嘅人，作其他人嘅幫助。

嘩，係咪好複雜呢？所以我哋真係諗個名諗咗好耐好耐㗎！英文名係我擇嘅，咁搵英文名，一係就上網或睇書，一係就自己作個英文字嘅啫，難度唔算高，但係中國文字博大精深，又要有意思又要國語同廣東話都好聽又要唔好俾人改埋啲唔好嘅花名仲要自己鐘意又唔好同人撞名，你都唔好話容易。所以呢個中文名係我哋到最後嗰個月，係咁攞住本字典死諗爛諗先諗到㗎！而咁醒諗到呢個名嘅，當然係我...老公啦！ :)

其實仲有好多好多有關BB出世嘅感恩事要分享...不過都係時候要休息一下嘞...唔緊要啦，嚟緊仲有大把時間嘅！ :)

再次多謝大家嘅代禱同埋關心！:)