流感針

睇完西姐個blog，見到佢儲起嘅80幾包人奶，簡直係歎為觀止，我最多都係「儲」到3樽奶，每樽2-4安士，仲要唔駛擺入冰格㗎，因為好快就要食埋㗎嘞...所以上個星期去咗醫生度配「奶丸丸」。食咗之後真係多咗啲人奶㗎！

醫生係咁倚俾咗一個禮拜嘅藥丸俾我，所以禮拜二又要去攞過。

攞藥嘅時候，醫生順便問我想唔想打流感針喎。其實我從來無打過㗎，以前打要錢㗎嘛！今次因為我生咗阿B，所以政府可以俾初生嬰兒父母免費打流感針。

平時嘅我，有便宜梗係唔駛洗頸啦！但係我聽講，打完流感針，會病㗎喎！如果唔打針無事，反而打完針病咗，咁點湊仔呀？

我個醫生不嬲都好淡定，乜都話無事嘅，不過今次連佢都話：「哦，都唔一定會病嘅，都係1/3人會有反應啫...你自己決定啦！」

最後...我都係打咗...搏一搏啦！打咗針可以保住阿仔無咁容易病吖嘛！

感謝神，終於我都無病到！ :)不過亦有可能係因為我之前已經病咗，所以而家就無事囉。:)