不過係呀，我哋十月頭返咗香港十日，而家返咗嚟啦！:)
十月三號返香港，因為係零晨機，所以諗住俾仔仔瞓一陣先起程，點知唔瞓由自可，一瞓咗嗰個零鐘佢就成晚醒哂唔再瞓！成程機就係咁要我同佢玩（仲要只係得我同仔仔坐飛機，老豆搭第二班機㗎！），而我又攰到不行，仲要一上機個眼鏡就爛咗，而仔仔喺飛機嘅十一/二個鐘裡面竟然尿濕咗五條片，仲要次次都漯埋衫！但係我只係帶咗一套衫替換咋喎（其實係兩套，但係一套靚仔衫衫係要嚟見爺爺嫲嫲嘅，未到最後一刻唔著得！），所以就只可以晾乾啲濕咗嘅衫（無洗）然後著番...
無辦法啦，點估到阿仔會攪成咁㗎喎...
去到台北機場，死啦，我全部片片都用哂啦喎（所有行李都無哂片片，因為其他嘅都喺老公個喼），咁點捱到返香港呀？機場禁區又無片片賣，咁套靚靚衫衫都實濕㗎喎... 但係真係好感謝神，因為我諗吓諗吓，發現原我仲收埋咗一條片喺架Stroller個袋袋度（係呀，我諗住我都有可能會剩係帶住仔仔坐住stroller唔帶BB袋㗎嘛...），所以我都仲有一個後備！真係好感恩㗎！
不過，返到香港就梗係要買片片啦，因為老公要到夜晚先到，我就朝頭早就已經去到香港啦，一條片點都頂唔到全日啩...
而喺機上，因為我要照顧住仔仔，所以全程機無食過一餐飛機餐，所以個空中少爺（都應該四、五十㗎嘞）就同我講：「你成程機都無食過嘢咁辛苦，不如我哋攞啲叉燒飽俾你食啦！」
我真係好感動，因為我由溫哥華飛台北呢程機其實捱得好辛苦，我成日都睇表睇吓機時先飛到，但係有人會咁樣關心我，我真係好開心。
而佢仲唔只俾咗一個叉燒飽俾我，而係四個熱辣辣又好好味嘅叉燒飽！ :)
終於我同仔仔一人食啲（佢食皮我食饀）食咗三個半飽飽！
華航真係唔錯！:)
呢度係喺台北機場路中心影嘅相：
歡迎來到台灣！:)
機場其中一個好特別嘅地方就係佢哋會有唔同嘅祈禱室：
有天主教：
有道教
仲有回教㖭！
都幾特別！:)
由台灣到香港嗰程機，我諗全機都無三成滿，所以我哋兩個可以坐哂全行，啲空姐們仲成日行過都同仔仔玩㖭！
我亦都終於有機會食吓飛機餐啦！:)
Posts
1 comment:
祝平安回加.
Post a Comment