今朝，家姐臨返教會唔見咗抽鎖匙。佢周圍搵到搵唔到喎，後來借咗媽媽條鎖匙就走咗嘞。臨走嘅時候同我講：「你周圍同我搵吓啦，同埋睇吓係唔係享享攞咗去玩唔知擺咗去邊啦。」
我跟住就努力去搵鎖匙啦，包括去埋所有阿仔有機會收埋鎖匙嘅地方都搵哂，但係都係搵唔到。
我喺樓下個廳搵緊鎖匙嘅時候，阿仔就喺我身邊經過。我諗：「橫掂都係咯，問吓無壞嘅...」跟住就問十九個月大嘅仔仔：「仔仔呀，你有無攞過yiya抽鎖匙嚟玩呀？你知唔知yiya抽鎖匙擺咗喺邊呀？」
跟住阿仔就話：「鎖匙？」我話：「係呀，yiya抽鎖匙呀，你知唔知放咗去邊呀？」
跟住阿仔停咗兩秒，諗咗一陣，就同我好肯定咁講：「涼涼！涼涼！」仲要隻手指住樓上㖭。
涼涼，即係沖涼。唔通係喺yiya個沖涼房？
我都有啲懷疑，阿仔係咪真係知㗎？（同埋我其實唔知阿仔明唔明我講乜）不過我諗：「橫掂都係咯，睇吓無壞嘅...」終於就走咗去yiya個浴室。
原來家姐抽鎖匙放咗喺佢條牛仔褲嘅袋裡面！
我都而家都唔知點解阿仔會知抽鎖匙喺嗰度，不過我會考慮第時無論唔見咗啲乜嘢都問吓阿仔，睇佢會唔會有答案！:D
Posts
3 comments:
hehe it's so funny :)
Auntie May, Koen knows more then you thought.
Every time when Mama couldn't find something and asked me: "你知唔知XX 去邊呀？" I will tell her "知", and bring it to her. As 99% of the time I took and put it away myself.
Matus好叻仔喎幫手搵番啲嘢！呢啲就叫做「解鈴還需繫鈴人」啦！
Post a Comment