我與仔仔長征的故事

嘩，原來已經係成個禮拜前嘅事囉...乜我真係忙咗咁耐咩？

anyways,上個禮拜五，因為約咗呀女去行街街（補祝生日同埋慶祝放假同埋預祝聖誕），而又唔想放老公飛機，話哂都係佢最後一日返呢間公司吖，所以就決定同阿仔兩母子浩浩蕩蕩咁搭巴士由Richmond去Metrotown，跟住等老公嚟同我哋去今晚飯嘞。

其實都唔算好大工程啫，我屋企附近有架430，一上車就可以去到Metrotown，唔駛轉車唔駛盛，實在方便！

不過都唔簡單㗎，因為之前要返媽媽度餵阿汪，啲時間唔我控制之餘，巴士schedule又唔密，如果miss咗一班車，就要等足半個鐘先有第二班車㗎。

所以我呢個長征嘅故事，係由等巴士開始嘅。

話說，我本來係諗住搭兩點左右班巴士嘅，不過為咗安全起見，我都Check埋兩點搭八係會有下一班巴士嘅，諗住一定ok啦，點知搞吓搞吓，我成三點搭二先可以泊低架車走去搭巴士！我心諗：死啦，唔知班車會唔會走咗㖭㗎，我無睇清楚兩點搭八之後班車係乜嘢時間到站㗎，而且我就算泊低車，都要再行三到五分鐘先到車站，咁點呢？

咁都無辦法㗎，唯有推住架bb車行快兩步啦...

我一路行，就feel到後面有巴士行緊嚟，不過好在塞車，所以我行到站，架車都未到。到架車嚟到，一睇，原來真係430嚟㗎！我真係第一時間就感謝神啦！:)

不過見到架車，吓，乜係樓梯嚟㗎？點上呀？

我一邊諗，我身旁一位印藉人士就問我需唔需要幫我嘞！

當然好啦！唔該哂！:)

上到車，見到有人又係推住bb車，我諗：咁點泊我架bb車好呢？跟住呢位太太就同我講：你架車泊我隔離咪得囉！


真係好啦！唔該啦！:)

佢個仔仔好得意㗎！眼仔大大，眼睫毛又長又靚，佢仲好有興趣同阿仔玩，成日擰過嚟聊佢㖭！


阿仔太細嘞！遲啲大個啲再同哥哥玩啦！:)

坐喺車箱另一邊，個兩位講廣東話嘅男士。佢哋見到阿仔同埋另外嗰位小朋友，就攞出佢哋好勁嘅長鏡短鏡相機喺度影影影。後來我要餵阿仔食奶（食formular啫），佢又問可唔可以影我餵bb㖭！佢話見到我嘅笑容，覺得我好享受做媽媽嘅生活喎！

哈哈！係㗎！係好開心㗎！:)不過呢一個長征嘅旅程，都俾我有好多嘅經歷，都好好開心啫！:)