多謝伍太姨姨！

上星期三係阿仔最後一次去伍太姨姨度daycare。伍生就將過去同仔仔影過嘅相同video整咗一隻CD俾我留念。

多謝哂伍太姨姨（伍姨）一直照顧仔仔！你真係教咗佢好多嘢㗎！:)

睇返呢啲相，見到阿仔喺過去十個月嘅成長，覺得時間真係過得好快。呢段時間發生咗好多事，上帝將我哋一家翻天覆地嘅改變，要我哋面對新嘅挑戰，我知道前面 仲有好多新事物需要面對，但係上帝俾得我哋行呢條路，佢一定會保護我哋，而當我哋之後睇返我哋所經歷嘅，但願都會見到自己慢慢地成長。

今日仔仔成績一覽

今日去到Aunite屋企，因為專登早啲去，所以可以坐低同仔仔玩一陣先走。我諗住可以同佢一齊適應咗個環境，咁仔仔就唔會喊得咁慘啦。點知同仔仔玩咗成半個鐘，阿仔都係成隻樹熊咁攬到實...終於由唔遲到搞到遲大到，Auntie要使用武力「的」走阿仔，我先走得甩。

During the day我都有少少驚阿仔會同尋日十樣喊到儍，但係一路都無收到Auntie電話喎...終於一點幾打電話俾Auntie，就知道原來阿仔喺我走之後無幾耐就無再喊啦！佢仲瞓咗一覺，同埋正喺度食緊嘢㖭！:) 到我返去接佢嘅時候，佢已經同姐姐玩緊啦！:)

希望阿仔可以喺新Auntie度更加適應，同埋學到更多嘢啦！

新挑戰

下個禮拜，仔仔就要告別任太，去任太屋企附近嘅伍太屋企繼續daycare嘞。

初初其實都有少少擔心，因為任太實在太好太錫仔仔啦，而且自己又唔認識伍太，所以都唔知會唔會ok。但係今日同伍太溝通過，又帶咗仔仔去佢屋企逗留咗一陣，就開始有多啲信心嘞。伍太都係一個好鐘意小朋友嘅人，人又好，唔會驚佢對仔仔唔好。

不過阿仔今日狀態唔係好好，唔係好肯跟伍太玩。唔緊要啦，下個星期二開始慢慢嚟啦！:)

多謝各位！

哎吔，差啲唔記得同大家分享番㖭... :)

上個星期，當我仲喺度煩緊九月之後Daycare嘅事情嘅時候，有位太太打去我公司，話係Lisa介紹嘅，話可以幫我照顧仔仔。（我諗咗好耐先諗到Lisa係余子麟嘅阿姨...）佢有兩個女女，十一十二歲左右啦，因為要湊小朋友，所以唔會出街，就可以幫我照顧仔仔囉。不過佢因為只係喺香港照顧過小朋友，無喺加拿大照顧過,所以唔知市價係幾多，初時佢講個價錢，計吓計吓要成千六蚊一個月！不過後來同佢講番，因為我哋只會需要湊四日，又會提供埋食物俾佢，所以我哋俾六百蚊一個月俾佢就得啦！:)

啱啱星期二去探咗佢屋企，好好呀，成間屋只係一層，唔駛驚碌落樓梯，佢哋又好注意清潔，我哋去睇嗰日啱啱係每年一度洗地毯嘅日子（嘩！年年洗地毯！都未聽過！）。呢位太太又好open，同我哋講如果有乜嘢唔想佢教仔仔或者想佢教仔仔，就直接講俾佢聽。兩個女女（特別係細女）又好鐘意同仔仔玩，屋企又多玩具，佢哋又係基督徒，又注重要返教會嘅時間...所以真係見到上帝俾我哋好大好大嘅恩典！:)

嚟緊九月，我哋就會帶仔仔去呢位auntie屋企，希望到時佢會適應啦！

多謝大家嘅代禱！:)

Hey，不要難過...

上帝好幽默。

我一直都諗住搵朋友嘅媽咪同我九月之後凑仔仔，月頭嘅時候先同auntie講過，諗住遲啲再搵佢講細節。

但係今日收到朋友電話留言，佢話佢媽咪打咗幾次電話俾我都唔通，可能因為個號碼唔啱，跟住就話俾我聽因為佢唔係100%肯定我係唔係搵佢daycare，所以就將我個位俾咗第二個人。

問題一：
Auntie搵唔到我？但係我個friend 都有我電話啦！佢又搵到我喎！

問題二：
唔係100%肯定我係咪搵佢daycare？我月頭先同auntie講過咋喎！

上帝完全係挑戰我對我隻歌啲歌詞嘅信任程度：

Hey，不要難過，
何用為得不到的太瘋魔？
如若細心數，
你知道已經不錯。
誰在意還得不到甚麼？

咁...即係又要繼續搵daycare啦...

咁，西姐麻煩你都係俾俾你個做daycare嘅客嘅資料我吖唔該！:)

上帝有供應！

我相信係因為弟兄姊妹嘅禱告，令我哋咁快可以解決到仔仔呢兩個月daycare嘅問題！

今日老友Mandy打電話嚟，話佢同阿媽（任太）傾過，佢媽咪話可以幫我呢兩個月照顧阿仔，到九月嘅時候就可以搵第個auntie啦！

好呀！任太好好㗎！我又同佢熟，佢又好人又熱情，仲要識我媽咪㖭！如果安排到，可以得閒等佢帶埋阿仔去我媽咪度，一解我阿媽對我仔仔嘅單思之苦！

任太會由七月開始take care仔仔，咁到時我就唔駛咁忙又凑仔又返工啦！

感謝神！:)