多謝伍太姨姨！

上星期三係阿仔最後一次去伍太姨姨度daycare。伍生就將過去同仔仔影過嘅相同video整咗一隻CD俾我留念。

多謝哂伍太姨姨（伍姨）一直照顧仔仔！你真係教咗佢好多嘢㗎！:)

睇返呢啲相，見到阿仔喺過去十個月嘅成長，覺得時間真係過得好快。呢段時間發生咗好多事，上帝將我哋一家翻天覆地嘅改變，要我哋面對新嘅挑戰，我知道前面 仲有好多新事物需要面對，但係上帝俾得我哋行呢條路，佢一定會保護我哋，而當我哋之後睇返我哋所經歷嘅，但願都會見到自己慢慢地成長。

學瞓覺(Again...)

我番嚟啦！

原來已經差唔多成個月無Post自己嘢...除咗因為阿仔係咁搶部相機之外，有時咗啲相，但係又唔記得帶電腦返屋企，所以無得upload，搞到乜都遲哂...

四、五日之前，阿仔突然間要我同佢夜晚瞓覺喎。我又唔知點解突然心軟走去同佢瞓地下。點知就出事嘞...之後每晚佢都要同我瞓，祈完禱之後係咁攬住我唔放手，又喊得好厲害：前晚仲喊到嘔咗成支奶落地㖭...

其實我都好徬徨唔知點算，只可以努力地祈禱，求主再次教仔仔瞓覺啦。

尋晚，同仔仔玩咗一陣，唔知點解想同佢唱 "I offer my life" 喎（平時唱Jesus loves me）。唱完之後又好平安，覺得無論係點樣，我都可以將結果offer俾上帝使用。祈完禱之後，佢又捉住我喊。我鬆開佢之後就同佢做sleep training，過咗十分鐘入去（因為佢仲喊緊），一邊同仔仔抺眼淚嘅時候，我同佢講：「我知道仔仔好叻㗎，仔係識得自己瞓㗎喎，不過一時間唔記得之嘛。我哋一齊求主耶穌俾你勇敢去自己瞓啦！媽咪知道你得㗎，求天父俾仔仔勇氣啦...」跟住仔仔 in stead of 好似之前嗰晚咁捉住我捉得好實咁喊，佢放開咗手自己企喺度喊！我知道仔仔需要人鼓勵佢同埋肯定佢嘅能力，亦都需要媽咪嘅諒解。跟住我再出去，佢喊多十分鐘左右就瞓咗，今朝仲瞓得好好，好遲先起身㖭！

今晚我又同佢預備瞓覺，臨瞓之前祈禱仔仔又係捉到我實一實，祈禱之後我同佢講「仔仔好叻㗎，可以自己瞓覺喎，我哋求天父幫助我哋吖！」再傾咗一陣，仔仔就靜靜地自己企喺床，到我出門口佢都唔喊自己瞓咗啦！

感謝主！要俾個「叻」俾仔仔先！:)

A-Z

先嚟個confession。

其實我平時真係好少唱歌㗎。

就算唱歌俾仔仔聽都好少。

所以當Irene同Mavis同Matus and Kirsten唱ABC歌嘅時候，我只係同阿仔讀ABC：



不過阿仔係好鐘意音樂嘅。呢牌俾佢開始玩琴，次次佢行過個琴佢都叫：「唱！唱！」（其實應該係講「彈」）。我同佢彈啲有哂和音嘅歌佢就無乜反應，但係尋晚yiya同佢彈melody唱刷牙歌，佢就開心到跳哂舞！（下次錄俾大家睇！）

我諗，每件事情都有步驟嘅...

（btw，今日我同仔仔度高，佢比9日前我同佢度高咗12mm呀！好犀利呀！）

自動調校

尋日咪話阿仔早咗瞓嘅，不過個後果就係佢早一個鐘瞓覺，但係早一個鐘起咗身！

六點幾，阿仔就已經超級精神啦！

但係我哋全家人都未喎...

所以我喺餵完佢支奶之後，就攤咗喺佢個房瞓，佢就出去搵貓貓，因為yiya（佢叫姨媽做yiya）六點幾返工，佢同婆婆（我媽媽）六點會起身餵貓。阿仔順便搵婆婆玩，但係婆婆太攰要瞓覺（正常routine），就將仔仔擺番入嚟房，佢就一邊睇住阿媽瞓，一邊自己玩，玩玩吓又自己瞓瞓吓咁。

不過阿仔頭先好早就瞓攰要瞓晏覺啦（梗係啦！），又早咗個幾鐘十一點就瞓nap...

阿仔，下個星期先較夏令時間喎，你可唔可以遲一個星期先開始呢個新routine呀？-_-

暗瞓覺

明顯地，仔仔係未適應到自己一個仔一間房。

由星期一開始到今日，每日同佢去瞓覺，佢都煞有介事，做足準備，預備我一離開間房一熄燈就「哇哇」開始喪喊。

係喪喊，即係聲都顫埋喉嚨都拆埋不停咁喊。

次次一係就我入去同佢抺眼淚，一係就老豆入去同佢唱「月光光」，勁搞一大輪佢先瞓到。

其實我知仔仔唔係專登激我哋（主要係我，老豆忙到都無時間應付）嘅，今日同佢做完routine，同佢講咗一大輪道理，解釋其實媽咪好鍚佢，不過佢大個仔要學吓自己瞓云云，佢只係企喺床仔伏喺我隻手上面嗲嗲，好似同我講「我唔捨得媽咪呀」咁，跟住又攬住我，之前又要我抱抱，伏完喺我左邊又伏去我右邊，我知道其實佢只係唔捨得，好想同媽咪一齊啫。雖然同仔仔對話咗好耐，不過今日放低佢瞓覺，都係照喊，只係喊短咗，第一日一個鐘，第二日45分鐘，第三同第四日半個鐘，今日20分鐘斷斷續續喊完就瞓咗。

只希望仔仔可以快啲適應到啦，其實我個心聽到佢咁喊真係好唔安樂㗎...

掉

阿仔好容易就會掉嘢。

佢好少會對一樣物件有興趣超過五分鐘。玩具啦，杯杯啦，羹羹啦，盒盒啦，基本上佢只會玩一陣，跟住就會嚟手掉咗去，就算你俾番佢玩佢都唔會再玩㗎嘞。

求天父俾呢個仔仔在成長中學懂珍惜自己所擁有嘅一切，唔好咁容易就放棄已經得到嘅事物啦！